Gin-insister ni Atty. Axel Gonzales, sangka batikan nga abogado sa probinsya it Aklan nga dapat sabton it suspendidong Bureau of Corrections (BuCor) Director-General Gerald Bantag ro statement it mga prosecutor angot sa kaso it pagpatay sa brodkaster nga si Percival Mabasa ukon Percy Lapid.
Nasayuran nga sambilog si Bantag sa ginaturo nga mastermind sa pagpatay kay Lapid.
Suno kay Atty. Gonzales nga ro preliminary investigation nga ginapatigayun hay owa pa nagakahueogan nga guilty ro akusado sa nasambit nga kaso.
Ginpunto pa kara nga ro estilo ni Bantag hay ginapalabo ro isyu bangud sa pag-eakip it ibang isyu kapareho it pagdaeahig sa pangaean it Justice Secretary Crispin Remulla.
Ro pinaka-isyu sigon nga dapat masabat ni Bantag hay kung ham-an it natabo raya sa BuCor nga anang ginadumaeahan.
Matueopangdan nga nauna eon nga nagpahayag it kahauman ro suspendidong BuCor official nga atubangon ro mga kaso nga posibleng igapasaka kontra kana agud nga malimpyuhan ro anang pangaean kadungan it paghueat it igapagguwa nga subpoena.
