KALIBO, Aklan—Ginakasubo ni Aklan 1st District Board member Nemesio Neron ro mga nagakatabo sa sueod it Bureau of Corrections (BuCor).
Partikular nga gintumod kara ro maabu nga sindikato ag ro operasyon it iligal nga droga sa sueod it kulungan.
Tyempo eon sigon nga maghueag ro gobyerno para matapa eon ro mga bulok nga hilimuon sa sueod it correctional prison.
Ginsuhestiyon man kara nga dapat makaangkon it maidid nga screening antes magsueod sa pasilidad ag butangan it CCTV para mataw-an it nagakaigo nga monitoring ro aktibidad it parehong priso ag tawuhan it BuCor.
Mag-euwas kara, nagakadapat sigon nga i-transfer eon ro presenteng site it BuCor sa mas mabahoe nga lugar, himuon raya nga transparent ag baeasahon ro management para masiguro nga malimpyo eon raya sa anumang krimen.
Matueopangdan nga nag-umpisa nga magguwa ro nagkaeain-eain nga isyu angot sa BuCor kasunod it pagbaril-patay sa brodkaster nga si Percy Lapid kung siin ro pila sa mga eakot sa krimen hay halin mismo sa sueod it pasilidad kaeakip ro suspendidong BuCor Director-General Gerald Bantag nga ginaturo nga mastermind.
