Ginasapinal eon lang ro mga dokumento angot sa proposed budget it Aklan provincial government para sa dag-on 2023.
Raya hay matapos ro ap-at nga adlaw nga deliberasyon it natungdan nga komitiba it sangguniang panlalawigan ag mga nagkaeain-eain nga departament heads.
Suno kay Aklan second district board member Jay Tejada, kapin sa P2.626 bilyon pesos ro proposed budget para sa nasambit nga dag-on nga may temang “Strengthen Resilience Towards Recovery”.
Nakaangkla gihapon sigon kara ro mga programa ag proyekto it gobyerno probinsyal para sa pagrekober it probinsya halin sa pagkalugi tuga it pandemya.
Angot kara, ginapabugae it probinsya nga kita hay sangka billionaire province bangud nga may makarundaya kita kabahoe nga pondo para mapadaeagan ro probinsya.
Ginpahayag dugang ni Tejada nga nagtaas ro budget it probinsya para sa masunod nga dag-on it kapin sa P100 milyon pesos sa pihak nga nakaagi it pandemya ro Aklan ag pagkaeogmok eabi eon sa industriya it turismo nga ginaboe-an it mabahoe nga income it gobyerno probinsyal.
Mabahoe nga pondo ro halin sa local income para sa masunod nga dag-on bangud nga 14% eamang ro tax allocation maghalin sa national government.
