Hugot nga nagapamaeabag ro Alliance of Concerned Teacher’s Partylist sa ginaduso nga Maharlika Wealth Fund ukon ro bag-o kara nga bersyon nga Maharlika Investment Fund.
Suno kay Congresswoman France Castro, ACT Partylist Representative nga bukon kita it sigurado sa investment nga pagasudlon it gobyerno eabi pa ag savings it tawo ro pagagamiton nga paunang kapital maghalin sa mga financial institutions.
Eabag sigon raya sa constitution ag posibleng uwa it transparency nga matabo.
Maskin nga ginduea eon nanda ro P125 bilyong Government Service Insurance System (GSIS) allocation ag ro P50 bilyon halin sa Social Security System (SSS) nga orihinal nga kaparte it gintingob nga grupo hay uwa gihapon raya nagakabagay makaron nga tyempo.
Raya hay matapos nga nagapabilin nga maabong utang ro gobyerno nga mas pang lomobo sa tyempo ni dating Pangueong Rodrigo Duterte.
Ginpahayag dugang nga maabo pa ro dapat nga asikasuhon nga mas importante kaysa sa ginaduso nga investment nga maskin surplus nga pondo ro pagagamiton hay bukon gihapon raya it sigurado kon makabulig sa pag-umwad it nasyon ag sa mga kubos nga pumueoyo.
