KALIBO, Aklan—All set eon ro security preparation para sa nagahilapit nga in person weeklong celebration it Kalibo Sr. Sto. Niño Ati-Atihan Festival 2023.
Suno kay Kalibo sangguniang bayan member Ronald Marte, raya ro andang naistoryahan sa ginpatigayon nga meeting it Kalibo Ati-Atihan Festival Board ukon KAFEB nga presided ni mayor Juris Sucro.
Sa nasambit nga hinun-anon, naaprubahan sigon ro resolusyon ni Marte nga makaangkon it gunban sa banwa it Kalibo bilang kaparte it selebrasyon it Ati-Atihan festival nga maga-umpisa sa Enero 6 ag magatapos sa Enero 16.
Angot kara, ginadumilian ro pagdaea it armas ag iba pang mga hinangiban nga pwedeng makasakit sa mga merrymakers, bisita, deboto ag turista.
Ginpahayag dugang nga sa Enero 8 hay magaabot eon ro augmentation uniformed police maghalin sa regional office VI ag ro iba sa mga raya hay magasunod sa Enero 11.
Paga-umpisahan eon man ro pagpatigayon it checkpoints sa may bahin it Tigayon ag sa may Kalibo-Numanci bridge.
Antes pa man sigon makasueod sa festival zone area hay may pagsikyar anay sa mga kagamitan nga daea it mga merrymakers agud nga masiguro nga uwa ro mga raya it daea nga maskin anu nga posibleng makasakit sa kapareho nandang nagasinadya.
Nasayuran nga ginpaguwa eon it lokal nga gobyerno ro mga nakalinyadang aktibidad sa sang dominggo nga selebrasyon.
