Nagatrabaho bilang “ceremonialist” sa Brazil ro 60-anyos nga si Baltazar Lemos.
Bangud sa nasambit nga trabaho, maabung kasae, bunyag ag funeral eon imaw nga gin organisa.
Matapos mag-organisa it sangka funeral nga gintambungan it masobra sa 500 nga katawo, nag-isip si Lemos kun ano man ayhan kaabu ro magatambong kon imaw hay iga-eubong.
Agud nga testingan kon ano imaw kapalangga it mga tawong nakapalibot kana, nag-post imaw sa anang Facebook account it sangka pekeng anunsiyo nga nagahambae nga gindaea si Lemos sa Albert Einstein Hospital sa Sau Paolo ag idtu man ginbawian it anang hueam nga kabuhi.
Maabu ro nakibot ag nagtau it pakikisimpatiya sa comment section.
Masunod nga gin post nana hay ro adlaw ag lugar kun sa siin pagahiwaton ro funeral ceremony ni Lemos.
Maabu ro nagtambong sa lamay ni Lemos sa sangka chapel sa banwa it Curitiba.
Samtang ginapatigayon ro funeral service ag nagataeangis ro mga bisita, gulping nagpakita sa altar si Lemos ag ginexplikar nga buhi pa imaw ag raya hay sangka “experiment” para makita kun ano kaabu ro magatambong sa anang eubong.
Akig nga naghaealin ro mga tawo sa chapel.
Nagkalhit ro nasambit nga istorya sa Brazil hasta nga nag abot raya sa national news.
Sa sangka interview, ginpahayag ni Lemos nga maskin ro anang immediate family hay owa it nasayuran sa nasambit nga “experiment”.
Kat nagpangayo it pasaylo , akig s a gihapon ro pila sa anang igbata bangud nga nagakabaeaka ro mga raya sa 80 anyos nga ina ni Lemos nga sangkiri nga inatake sa puso bangud sa peke nana nga pagkamatay.
Nag-viral sa mga social media websites ro nasambit nga kalokohan nana ag presenteng gina putakte it bashers si Lemos.
Maabung netizens ro nagahambae nga basi nga owa eon it magatambong ag makikisimpatiya sa anang eubong sa oras nga maging matuod eon ro anang pagkamatay.
