KALIBO, Aklan—Uman nga magadihon it resolusyon ro barangay council it Bacan, Banga nga nagatuyo nga ma-repair eagi-eagi ro mga guba nga karsadahon sa nasambit nga lugar.
Suno kay Punong Barangay Allen Robelo it Bacan, Banga nga igapasa nanda ro resolusyon sa Provincial Engineering Office, kamana man sa taeatapan ni Governor Joen Miraflores agud nga mataw-an it nagakaigo nga aksyon.
Ginatawag sigon nanda nga devil road ro karsada partikular ro portion nga halin sa Bacan Elementary School hasta sa boundary it Taba-ao bangud nga haeos adlaw-adlaw hay may nagakatabu nga aksidente.
Base sa andang record antes ro pandemic, haeos an-um nga katawo eon ro namatay sa nasambit nga provincial road matapos nga madisgrasya.
Kadungan kara, nag apela imaw sa sangguniang panlalawigan ag iba pang natungdan nga ahensiya it gobyerno nga tutukan ro andang problema nga makabig suno kana nga takaw-aksidente.
Nasayuran nga bukon eamang it lubak-lubak nga karsada ro problema kundi nga haeos huk-ab ro semento mag-eowas pa sa mga mabahoe nga buho tuga it owa it pundo nga pag-inagi it mga daeagkuan nga mga trucking halin sa quarry site.
