Ginpasiguro it Commission on Higher Education (CHED) nga magiging iba ro konsepto engkaso nga ibalik ro mandatory Reserved Officers’ Training Corps (ROTC) sa nasyon.
Suno kay CHED Chairman Popoy De Vera, apisar nga may pilang ka mga pagkabaeaka ag isyu nga kinahangean masabat kasunod it pagduso para sa pagbuhi uman it Reserved Officers’ Training Corps, magiging iba sigon ro pagpatuman it programa kumpara sa dati.
Sa sueod sigon it haeos 20 dag-on hay optional eamang ro ROTC sa nasyon rason nga dapat sayod eon sigon ro mga pagkasaea nga indi eon dapat pa nga mauman ag dapat nga ireporma.
Ro konsepto sigon it ROTC hay napahaba pa sa hagna nga Citizen Service Program (CSP) kung siin sandig sa mga gintalakay it mga mamalidha, tanan nga mga college students hay kinahangean magpaidaoem sa Citizen Service Program sa sueod it daywang dag-on.
Ro mga nakakumpleto it mandatory 2 year Citizen Service Program, ginpaathag kara nga puweding mag-proceed sa Advanced ROTc sa sueod it dugang nga daywang dag-on.
Engkaso nga raya hay makumpleto, posibleng ma-recruit eon para maging katapo it Armed forces of the Philippines (AFP).
Bukon it pareho sa nakataliwan nga implementasyon, ginpasiguro ni De Vera nga bukon eon eamang it martsa-martsa ukon formation ro igaturo kundi ro konsepto sandig sa bersiyon it Kamara hay magbilog it sangka pamatan-ong Pilipino nga may matun-an sa civic duty, individual safety and community safety, disaster preparedness and management, ag citizen soldier training.
Sangka konsepto para mahasa ro sangka pamatan-ong pilipino nga haom magserbi para sa nasyon sa tyempo it kaayusan ag sa giyera.
