Sangka eaeaki sa Taiwan ro nagapangatubang sa daywang buean nga pagkakulong matapos may maaksidente bangud sa anang alagang parrot!
Natabu ro insidente sa Tainan city, kat ginpamasyar it eaeaking nakilaea sa pangaeang Huang ro anang daywang alagang Macaw sa sangka local park.
Ro sambilog sa mga parrot ni Huang hay nagdapo sa abaga it sangka jogger ag bayolenteng ginpaspas ro anang pakpak.
Sa kahadlok it jogger, naduea-an raya it balanse ag aksidenteng natumba.
Nag-angkon ro jogger it dislocated hip joint ag fractured pelvis nga rason agud nga raya hay maospital ag magapamayad it mabuhay nga tiempo.
Suno sa jogger nga gintago sa alyas nga “Dr. Lin”, sang domingo ro ginbuhay nana sa ospital ag an-um nga buean imaw nga owa nakapagtrabaho.
Sangka plastic surgeon si Dr. Lin ag kinahangean nga nakatindog imaw sa mga procedure nga ginapatigayon nana sa anang mga pasyente.
Bangud kara, nagdihon it demanda si Dr. Lin bangud nga mabahoe nga financial loss ro naging epekto it mga naangkon nana nga injuries.
Nagpabor ro Taiwan Tainan District Court kay Dr. Lin bangud nga napamatud-an nga naging pabaya si Huang sa anang mga parrot.
Ro mga parrot ni Huang hay may kataason nga 40 cm ag eapad nga 60 cm.
Una sa kategoryang “large animal” ro anang parrot ag nakita sa imbestigasyon nga owa imaw it ginpahaum ukon gin-obra nga pag-dahan sa oras nga maging rason it aksidente ro anang mga alaga.
Ginsentensiyahan it “causing unintentional injuries” si Huang ag gintaw-an it penalidad nga daywang buean nga pagkakulong.
Kinahangean man nana nga magbayad it danyos perwisyo kay Dr. Lin nga nagabalor it 3.04 million New Taiwan dollars.
