Arestado ro daywang ka mga suspek nga responsable sa pagtakaw it motorsiklo sa Brgy. Bulwang, Numancia.
Una kara, nag-apela sa publiko ro biktima nga si Gerry Laurente nga mabuligan imaw nga makit-an ro anang behikulo nga tinakaw kon sa siin ro insidente hay naboe-an it cctv footage.
Sa imbestigasyon nga ginpatigayon it Numancia Police Station, natumod ro mga suspek nga si Christian Agurin, 20 anyos it Brgy. Ugsod, Banga matapos nga boluntaryo raya nga nagsurender sa Banga Municipal Police Station ag ro kaibahan nana nga sangka 17 anyos it Brgy. Cerudo sa nasambit man nga banwa nga gin-aresto sa mismong panimaeay nanda.
Narekober ro motorsiklo sa Brgy. Rosario, Malinao matapos nga anda raya nga gin-abandona bangud nga naubusan it gasolina.
Sa pahayag it suspek nga si Agurin, uwa imaw it plano nga takawon ro behikulo apang ginsampit raya ag daea sa aeak nga nainom hay nahimo nanda ro motornapping.
Plano sigon nanda nga magpangayo it pasensya sa tag-ana ag bayaran eon lang kon anuman ro danyos nga andang nakriar.
