Naga-abot eon sa 28,000 ro namatay sa mabaskog nga linog nga tumama sa Turkey ag Syria ko nagtaliwan nga domingo.
Suno sa United Nations, posibleng madoble pa ro mga patay bangud nga maabu pa ro gina-usoy sa mga nahugos nga edipisyo.
Mabudlay ro pag-rescue bangud nga grabeng eamig ro tumama makaron sa Turkey.
Daywang Pinay man ro napabalitang namatay samtang sambilog ro nakitang buhi kan-o eamang.
Sa mga nagguwa nga video, makita kun paalin amat-amat nga nagabagsak ro mga building sa siyudad it Hatay.
Mabatian ro pagsinggitan it mga tawo samtang padayun sa pag-uyog ro eugta.
Napueo nga probinsiya sa Turkey ro grabeng tinamaan ag haeos tanan nga mga building hay naguba sa gulpi eang.
Pati mga bag-ong edipisyo hay nahugos.
Naga-imbestiga eon ro awtoridad sa Turkey bangud sa pag-collapse it mga building ag 113 nga katawo ro ginmandu nga dakpon.
Ko nagtaliwan nga domingo, ginmandu eon it vice president it Turkey nga ikulong ro 113 suspects nga responsable sa pag-hugos it mga building.
Duda it mga awtoridad nga may kapabayaan sa pag-obra it mga building ro mga gin-arestong suspect rason nga nakaangkon it maeapnagon nga paghugos.
Makaron eamang sigon natabu ro makarondaya nga pag-hugos nga haeos owa it nabilin.
Linibu nga mga building ag mga baeay ro gulping nahugos sa maabung probinsiya ag siyudad.
Ro natabu sa Turkey ag Syria hay posibleng matabu man sa Pilipinas.
Ko 2013, nagpaandam ro Phivolcs nga kon tumama sa Metro Manila ro 7.2 magnitude nga linog, 37,000 nga katawo ro mamatay.
Mabahoe nga pangutana makaron kon ro mga edipisyo, condominium ag mga baeay hay makasarang sa kabaskog nga 7.2 magnitude nga linog nga ginpaandam it Phivolcs.
Nag-agi baea sa maayos nga pag-usisa ro istruktura it mga building ukon mga baeay?
May mga safety standards baea nga ginsunodng ro mga ginpatindog nga building ag baeay?
Nagsunod baea sa laye ukon ginpaagi sa “lagay”.
Mag-eowas sa pag inspection sa mga building agud nga masiguro kun eowas sa linog, importante man nga makaangkon it regular nga earthquake drill sa mga taeatapan it gobyerno.
Ipahaum ro mga pumueuyu sa pagtama it linog.
Tandaan nga ro pag-panic ro makamaeatay ag bukon it mismong linog.
