Hasta makaron hay indi gihapon matapos -tapos ro isyu angot sa modernization program it PUV.
Pilang dag-on eon raya nga gina debatehan ag makapilang beses eon man nga na-postponed ro pagpatuman, apang hasta sa makaron hay owa pa it klaru kun madayun baea ukon kinahangean pa it maid-id nga pag-estudyo angot sa nakabaehag kara.
May kahilabtanan abi kara ro pag-phase out sa mga traditional nga public utility jeepney ag pagabayluhan eon ro mga raya it modern jeepney.
Sa makaron hay haeos 60 porsiyento pa eamang it target nga mga saeakyan para sa modernization program ro nag-comply sa programa, samtang ro nabilin nga 40 percent hay padayon nga nagapasada gamit ro traditional nga jeepney.
Ro prangkisa para sa mga traditional nga jeep hay nakataeanang magtapos sa Hunyo 30.
Buot hambaeon nga pag abot it Hulyo 1, owa eon sanda karsada kon indi eon pagapasugtan it Land Transportation and Franchising Regulatory Board (LTFRB).
Ginhinyu eon it transport groups sa administrasyon ni Pangueong Bongbong Marcos nga marebisa ro nasambit nga programa antes eubusan nga maipatuman.
Posible sigon nga pag-abot it Hulyo hay uman nga maexperiensiyahan ro krisis sa transportasyon kun indi eon mapasugtan ro tradisyual nga jeepney nga makabiyahe pa.
Sa masunod nga Lunes hay may gintaeana nga transport holiday ro pilang transport groups.
Nagakontra ro mga operator ag driver it traditional nga jeep sa nasambit nga programa.
Pwede man sigon nga mapamoderno ro transportasyon pinaagi eamang sa rehabilitasyon ag indi eubusan nga pagbo-oe sa karsada it mga traditional jeep.
Imbes nga makabulig, siguradong maeubong sanda sa utang engkasong mapatuman raya nga magatuga eamang sigon it mas pang pag antus it mga maintok nga driver ag operator it jeep.
Kunsabagay, mabudlay gid man nga mag-utang nga sayud mo sa imong kaugalingon nga indi mo masarangan nga bayaran.
Kinahangean gid man nga pungkuan it mga eakot nga ahensya it gobyerno ag mga nagadumaea sa mga grupo it transportasyon.
Basi nga owa eang nanda naplastar it mayad ro andang parte ag sabat sa maabu nga mga pangutana kaysa nga maapektuhan ro pobreng mananakay.
