KALIBO, Aklan—Ginsuhestiyon ni Aklan 1st district board member Nemesio Neron nga ibalik ro “kamay na bakal” nga dating estilo ni Pangueong Rodrigo Duterte sa pagpatigayon it war on drugs it gobyerno.
Suno kana nga medyu amat-amat eon man nga nagabalik ro aktibidad it mga drug pusher ag user sa mga karsadahon.
Ko tiempo sigon ni Duterte hay maabu nga mga eakot sa kalakaran it illegal nga droga ro nag-lie-low bangud sa kahadlok sa anang patakaran nga ginahimo.
Raya hay kasunod it mga rebelasyon it pilang impormante ukon asset it Philippine National Police ag Philippine Drug Enforcement Agency ukon PDEA sa ginpatigayon nga pagpamati it House Committee on Dangerous Drugs nga ginapamunuan ni Surigao del Norte Rep. Robert “Ace” Barbers, kun sa siin nabulgar ro nagakatabu nga recycling it shabu ag pagbaton it reward nga shabu nga 30 hasta 70% ag bukon it cash.
Aminado si Neron nga posibleng nagakatabu gid man ro makarondaya nga kalakaran sa mga highly urbanized cities.
Sa mayad nga swerte suno kana ag owa raya naexperiensiyahan sa probinsiya it Aklan nga nagapabilin nga malinong ag matawhay.
Sa pihak nga parte, nasubuan sigon si Neron sa nabulgar nga anomaliya bangud nga engkaso nga indi matapna it PNP ag PDEA ro recycling it shabu hay siguradong owa it katapusan ro problema sa droga sa nasyon nga makabig nga saeot it sosyudad ag ugat it mga makangieidlis nga krimen.
Masyadong nakueangan sigon imaw sa aksyon makaron it law enforcement agency partikular it PDEA sa pagsabat sa problema sa illegal drugs sa nasyon.
Indi man sigon makasigurado nga libre eon ro aklan sa illegal drugs bangud sa presensiya it isla it Boracay nga sangka kilaeang tourist destination.
Handum man nana nga uman nga may madakpan nga mga drugs lords.
Tiempo man sigon nga mas pang pabaskugon ro internal cleansing it PNP ag PDEA.
