Sangka ama sa Shenzhen, China ro ginabatikos makaron it Chinese netizens matapos kara nga i-post sa social media ro video it pagtau it penalidad sa anang unga nga nadakpan nga nagapueaw sa paghampang it mobile games.
Makita sa video nga nadakpan it owa ginpangaeanan nga ama ro anang unga nga bugtaw pa it ala-1:00 it aga-aga ag nagahampang it mobile games.
May sueod pa sa agahon ro anang unga sa eskwelahan apang bilang penalidad, ginhambaean nana raya nga mag absent anay ag magpadayun eon lang it mobile games sa bilog nga adlaw.
Nagustuhan it unga ro gintau nga penalidad kana apang pag abot it alas siyete it agahon, nakabatyag eon raya it kadueuygon.
Kat magakatueog eon ro unga, ginpugngan imaw it anang ama ag ginpadayun ro paghampang it games.
Nag absent man ro ama sa anang trabaho para tutukan ro paghampang it unga.
Nag abot it hasta alas 6:30 it gabi-i ro paghampang it unga apang owa eon kara nasarangan ro masobra sa 17 hours nga paghampang rason nga nagpakitluoy eon imaw ag nagpromisa nga paga-limitahan eon ro mobile games.
Naghimo it kontrobersiya ro nasambit nga istorya sa Chinese netizens ag maabu sa nakatan-aw kara ro nagpaandam nga iga-report ro ama sa mga natungdan bangud nga sa tan-aw nanda hay sangka child abuse raya.
Sa makaron, gin delete eon ro video ag nagtau it pahayag ro ama nga owa nana gina rekomenda sa ibang ginikanan ro anang gin obra nga pagdisiplina sa unga.
