KALIBO, Aklan—Bangud sa maabu nga mga nakabaehag sa kontrata ro owa nasusunod, ginarekomenda it barangay council it Manocmanoc sa isla it Boracay nga ipa-kansela eon it lokal nga gobyerno it Malay ro ginsueod nga kasugtanan sa ECOS Sanitary Landfill and Waste Management Corporation.
Suno kay punong barangay Nixon Sualog it nasambit nga lugar nga gusto nanda nga i-terminate it LGU-Malay ro kontrata sa ECOS kasunod it mga reklamo it pilang residente ag eskwelahan nga maeapit sa centralized material recovery facility ukon MRF sa Manocmanoc bangud sa sobra kabaho nga hugum halin sa nakatambak nga mga basura.
Sa pag-review sigon nanda sa kontrata, natukiban nga maabu sa nakabaehag kara ro owa ginasunod it kompaniya.
Bangud kara, ginsuhestiyon ni kapitan Sualog nga makaangkon it pueong sa tunga nanda kaibahan ro LGU-Malay, ECOS, MENRO, ag barangay council it Balabag ag Yapak.
Kanugon suno kana ro minilyong piso nga ginabinayad it LGU sa ECOS, apang nagapabilin ro problema sa basura sa isla nga makabig nga eye sore sa mga turista ag nagatuga it kahalitan sa ikamayad nga eawas it mga estudyante ag residente.
Mas mayad sigon nga ibalik ro pagdumaea kara sa barangay ag magbakae eon lang ro munisipyo it kaugalingon nga barge ag garbage truck.
Madumduman nga ro ECOS ro nagahakot it kapin sa 60 hasta 70 tonilada it basura adlaw adlaw sa isla it Boracay ag ginapilak ro mga raya sa sanitary landfill sa Barangay Kabulihan sa mainland Malay.
Ginakolekta it dump trucks it ECOS ro basura sa collection points sa barangay it Yapak, Balabag, ag Manocmanoc antes nga igabiyahe sa staging area sa Manocmanoc sa MRF nga dayun nga iga-karga sa barge patabok sa Sambiray Port sa mainland Malay.
Nagaeaum ro opisyal nga maaksyunan eagi ro problema agud nga indi matabu it uman ro pagpasarado sa isla bangud sa pag-eabag sa pilang environmental laws.
Dugang pa nga nagsueod eon ro summer season kun sa siin dagsa ro mga turista.
