KALIBO, Aklan—Nakataeana nga igasalang sa committee hearing it Sangguniang Panlalawigan ro planong uman nga pagbuhi sa pagdredge sa Aklan river bilang kaparte it flood mitigation and disaster control project it gobyerno probinsyal.
Raya hay may kaangtanan sa urgent request ni Aklan governor Joen Miraflores nga magsueod sa sangka memorandum sa tunga Santarli (STL) Panay Resources Company Limited.
Suno kay Aklan first district board member ag chairperson sa committee disaster preparedness and peace and order nga si Nemesio Neron, tuyo kara nga taw-an it kahigayunan ro andang mga kaibahan sa komitiba kon may andang mga pangutana antes nga igapresentar sa plenaryo.
Maabo sigon nga natungdan it ahensya it gobyerno ro kaeakip engkaso nga padayuno ro plano.
Ginpahayag dugang it opisyal nga raya eon ro sabat sa mga naeksperyensyahan nga baha sa probinsya it Aklan bangud kinahang-ean eon nga maakad ro suba ag mabuoe ro mga sand bars.
Madumduman nga ko Enero 2017 kat ginpauntat ro dredging operations it nasambit nga kompanya kasunod sa protesta it mga residente it Brgy. Bakhaw Norte, Kalibo bangud sa pagkahugos it eogta sa kilid it suba.
