Gaoy eon ro mga pumueoyo it California, USA sa andang presenteng weather condition kon sa siin sa imbukada pa eamang it dag-on hay naeksperyensyahan ro grabeng pabuhos it uean ag snow storm nga nag-aywan it grabeng halit sa andang mga propyedad.
Ginpaathag ni Bombo International Correspondent Greg Aguilar, ko nagtaliwan nga dominggo hay limang katawo ro naireport nga namatay bangud nga napintaean it mga nagkaeoka nga punong kahoy partikular sa may Bay Area.
Samtang sa San Francisco hay nagkaeabasag ro mga saeaming sa skyscrapers bangud sa mabaskog nga huyop it hangin.
May pila pa ka mga buhawi ro nagpanaeasa sa southern California kon sa siin ginausisa eon makaron it National Weather Service ro halit nga gintuga it nasambit nga buhawi.
Ginpahayag dugang ni Aguilar nga haeos tanan hay nagaoy eon sa weather conditions sa andang lugar kon sa siin nakaperwisyo eon raya sa mga pumueoyo eabi eon ro mga nagabyahe adlaw-adlaw pasueod sa andang trabaho.
Ginaeauman nga sa masunod nga mga dinominggo hay maeksperyensyahan eon man nanda ro fair weather condition.
