Masako eon ro mga taga United Kingdom sa pagpreparar sa nagakataeana nga koronasyon ni King Charles III hinaga, adlaw it Sabado sa Westminster Abbey.
Makabig nga “party mode” eon ro mga tawo sa nasambit nga nasyon.
Raya ro ginpahayag ni Bombo International Correspondent May Vidal it United Kingdom.
Ginakaeangkagan sigon it haeos tanan nga mga tawo idto ro nasambit nga okasyon bangud matapos ro pagtaliwan it 70-anyos hay uman sanda nga makasaksi it makasaysayan nga koronasyon.
Suno kana nga ro tagsa ka mga panimaeay idto hay nagapatigayon it mga pagkinasadya ag nagapareparar it nagkaeain-eain nga pagkaon.
Ro iba sigon nga indi makatambong sa Westminster Abbey para personal nga saksihan ro nasambit nga koronasyon hay magapamantaw eon lang sa television samtang nagakaon it andang mga ginpreparar nga mga handa.
Sa makaron, ro mga karsadahon suno kana idto hay puno eon it mga banderitas.
Angot kara, igadeklara man nga holiday sa adlaw it Lunes para taw-an it kahigayunan rong tanan nga makapahuway.
Ginapahayag nga magkahalo-halo ro mga nagapabor sa opisyal nga pagkorona kay King Charles bangud sa pilang ka mga personal nga kontrobersiya nga ginapangatubang kara.
Apang sa pihak kara 80% sa mga tawo idto hay masadya nga imaw hay pagakoronahan eon ag maging opisyal nga hari it nasyon.
Sa pihak nga parte,antes pa man ro mismong adlaw it koronasyon hay hugot eon ro pagpatuman it seguridad ag full force sigon ro mga otoridad idto para masikyar ro kaeowasan it tanan nga magatambong sa Westminster Abbey.
