Sangka nabdos nga ginang sa Thailand ro gin akusahan it pagpatay sa 14 nana nga amiga gamit ro cyanide.
Ko Abril 25, gin-aresto ro 32-anyos nga si Sararat Rangsiwuthaporn matapos mamatay ro amiga kara nga si Siriporn Kanwong.
Naging suspek si Sararat bangud nga imaw ro ulihing nakaibahan it biktima antes raya nga namatay.
Magkaibahan sa Ratchaburi province si Sararat ag Siriporn para sa sangka religious retreat.
Sa suba ro biktima kat mag-collapse ag namatay.
Heart failure ro nakitang rason it kamatayon ni Siriporn ag sa autopsy results kara, nakitaan it cyanide sa eawas.
Ro daea nana nga kwarta, alahas, bag ag cell phone sa retreat hay indi eon makit-an.
Sa maeapnagon nga imbestigasyon it Thai Royal Police, nakita man nanda ro 13 sa mga amiga ag ex-boyfriend ni Sararat hay makadueuda ro pagkamatay.
Pila kara hay kapareho kay Siriporn nga namatay sa cyanide.
Ro mga biktima hay may edad nga 33 hasta 44, namatay sanda sa katung-anan it mga petsang Disyembre 2020 ag Abril 2023.
Kaabuan sa mga raya hay naduea-an it mga alahas, kwarta ag maeahaeon nga gamit matapos mamatay.
Suno sa mga pulis, raya eon ro pinaka-grabeng kaso it serial murder sa Thailand.
Nagapati sanda nga ro motibo sa pagpatay hay may kaangtanan sa kwarta bangud nga nasayuran nga may mabahoe nga kautangan ro suspek sa pila sa anang mga biktima.
Sa makaron , ginkasuhan si Sararat it 13 counts of premeditated murder.
Presente imaw nga nakakulong sa Women’s Correctional Institution sa Bangkok
