Mataeupangdan nga bukon eang it produkto ag serbisyo ro gina endorso it mga social media influencer makaron kundi pati sugae eon man.
Angot kara, nakita sigon it cybersecurity expert nga pila sa naduea-an it kwarta sa E-wallet app kan-o eamang hay nagasugae online.
Bangud kara, target eagson it Cybercrime Investigation and Coordinating Center ro mga influencer nga naga-endorso it mga sugae online.
Madumduman nga gin uean it reklamo ro sangka E-wallet firm bangud sa gina alegar nga nabawasan ukon naduea nga matsa buea ro kwarta it mga account owner.
Samtang, sambilog pa sa isyu kara hay ro pagiging eapnaag it sugae online.
Kun pauman-uman ag mabaskog ro pag engganyo it mga socmed influencers, bukon it imposible nga maabu nga maging interesado hasta nga maadik eon sa sugae.
Ro masubo, kon indi eon makontrol ro bisyo, maga-obra it maeain agud nga may ipangsugae.
Nauna eon nga namitlang it mga awtoridad nga may mga ginatugis eon sanda nga mga eakot sa illegal online gambling.
Antes pa nga maging ulihi ro tanan, kinahangean nga mas doblehon ro hueag kontra sa maeain nga bisyo ag ilegal nga hilimuon.
Ginahinyu man sa mga socmed influencers, maging mayad kunta kita nga halimbawa sa netizens.
