Mabahoe ro pagpasaeamat ag kalipay nga nabatyagan ni Aive Rose Raga-as it Aklan State University main campus matapos nga maeakip imaw sa listahan it mga topnotcher sa bag-o eamang natapos nga 2023 Licensure Examination for Teacher ukon LET.
Suno kana nga sorpresa ro pagpahisayod kana nga naeakip imaw sa top 10 sa tanan nga mga nagbo-oe it board exam.
Nakabo-oe imaw it marka nga 91% sa March 2023 Licensure Examination for Teachers nga gin release ko May 19, 2023.
Owa sigon imaw nakasayod nga ko rato nga adlaw magaguwa ro resulta bangud nga masako imaw sa anang trabaho.
Suno kay Aive nga handum gid man nana nga maging topnotcher agud nga makabawi sa kabudlay it anang mga ginikanan rason nga mag-eowas sa pangamuyo hay naghugod imaw it mayad sa anang pagtuon.
Nagapati imaw nga kon pursigido sa pag abot sa handum hay bukon it imposible eabi eon kon eakipan raya it hugod ag tiyaga.
Ro kursong education hay bukon nana it first choice bangud nga gusto nana nga magbo-oe it kursong criminology , apang bangud sa kapobrehon hay owa raya napursige.
Naging mabudlay man suno kana ro anang pagtuon ko pandemya bangud nga mabudlay ro internet connection sa andang lugar para sa distance learing.
Ginahaead nana ro anang kadaeag-an sa anang mga ginikanan kamana man sa mga igmanghud ag mga tawo nga nagsuporta kana kapareho it anang mga naging titser.
Nagtapos imaw nga honor student sa Elementary sa Sibalew Elementary School , sa junior high school sa Torralba National High School; senior high school sa Northwestern Visayan Colleges ag sa college man imaw hay cum laude sa BSEd General Science major.
Si aive hay ikaywa sa ap-at nga magmaeanghud.
Sa pihak nga parte, naging emosyunal si mrs. Ailyn raga-as sa pagiging topnotcher it anang unga.
Suno kana nga nagbunga ro anang kalisod ag sakripisyo sa pagtuon sa pihak it kakueangan sa pinansiyal nga aspeto.
Proud sigon sanda sa andang unga bangud sa anang naabot sa kabuhi .
