Striktong ginapatuman sa makaron ro no movement protocols ag biosecurity measure kontra ASF sa Brgy. Caano sa banwa it Kalibo agud nga makontrol ro mas pang pagkalhit it makataeapon nga sakit it baboy nga African Swine Fever ukon ASF.
Raya hay matapos nga nagpositibo ro blood samples nga ginboue sa sambilog maghalin sa ap-at nga mga baboy sa nasambit nga lugar.
Ginkumpirma ni Municipal Agricultural Officer Uriel Las Piñas ag gintaeana nga maging tagapaghambae sa mga concern angot ASF virus nga may kumpirmadong kaso eon it ASF virus sa banwa it Kalibo.
Raya hay matapos nga matapnan it sangka gulping namatay nga nayon ro sambilog sa ap-at nga nabiling buhi nga baboy.
Angot kara insigida sigon sandang nagpatigayon it mapping sa infected barangay.
Magapatigayon sigon sanda sa Lunes kaibahan ro Provincial Agriculture Office it culling sa sueod it 500 metro sa nasambit nga lugar.
Insigida man sigon nga gin-eubong ro namatay nga alagang nayon.
Sa gahom suno kay Las Piñas it executive order ni Kalibo mayor Juris Sucro partikular sa pagpatuman it 1-7-10 protocol , ginabawaean ro pagpaguwa it mga baboy ag pagpakatay sa Kalibo slaughter house maghalin sa infected nga lugar.
Ginklaro man kara nga ginapasugtan nga katayon ro sangka baboy sa andang ugsaran ag kan-on apang ginabawaean gid nga makaguwa sa andang barangay.
Nauna eon nga nagpaguwa si Kalibo mayor Juris Sucro it Executive Order No. 049 series of 2023, ro implementasyon it 1-7-10 protocol ag temporaryong pag limita sa tanan nga paghueag it live pigs, pork ag anuman nga pork- related products sa banwa it Kalibo maghalin sa lugar nga may ASF.
Sa pihak nga parte, ro mga hog raisers sa probinsya it Aklan nga naapektuhan it ASF hay nakataeana nga makabaton it ayuda kun nakapag-insured ro mga raya sa Philippine Crop Insurance Corporation o PCIC.
