KALIBO, Aklan—Matsa ginaloko ni Pangueong Ferdinand Marcos Jr. ro mga pumueoyo.
Raya ro naging reaksyon ni Danilo Ramos, national chairperson it Kilusang Mambubukid ng Pilipinas (KMP) sa nagtaliwan nga State of the Nation Address ukon SONA it chief executive ko adlaw it Lunes.
Suno kay Ramos, uwa sa reyalidad ro ginpanghambae it president eabi eon kat nagbuhi raya it kataga nga huyap eon ro adlaw it mga hoarders ag smugglers it produktong pang-agrikultura.
Gin-insister nana nga matsa uwa naga-istar sa Pilipinas si Marcos ag uwa raya nagapanindahan bangud nga padayon nga ginapakigsukoe it kaeabanan ro nagatinaas nga presyo it mga baeak-eon partikular ro bugas, tinuean-on, karne ag isda.
Ro ana nga sang dag-on nga pagpungko bilang presidente hay sang dag-on man nga kapalpakan sa sektor it agrikultura, pagpataeang sa tawo ag pagbudol nga ginamit sa anang mga byahe sa nagkaeain-eain nga nasyon.
