KALIBO, Aklan—Nagapadayon ro pagkuhit it mga atleta it Western Visayas it mga medalya sa Palarong Pambansa 2023 nga ginapatigayon makaron sa Marikina City.
Suno kay Department of Education ukon DepEd region VI spokesperson Hernani Escullar Jr. nga bangud sa pag-inuean-uean sa nasambit nga lugar hay inde malikawan nga may mga atleta nga nag-eain ro pamatyagan apang gilayon man nga nataw-an it medikasyon it standby medics.
Angot kara, padayon ro pagpamayagpag it rehiyon matapos nga nakakuhit eon it ap-at nga bueawan nga medalya nga ginakaeakipan it daywa sa athletics, tig-sambilog sa hampang nga swimming ag Taekwondo.
Samtang, ap-at man ro napasaalima nga silver medals nga nabuoe sa athletics ag swimming nga may tig-daywa.
Kamana man daywa ro bronze medals nga nakuhit sa hampang nga athletics ag swimming.
Sa pihak kara, inde man magpaulihi ro mga atleta nga maghalin sa probinsya it Aklan kon sa siin nag-amot sanda sa nasambit nga medalya partikular sa Swimming sa 100 Meters Backstroke, Secondary Boys si Jennuel Bool De Leon nga nakabuoe it silver medal kamana man sa 4×50 Meters Medley Relay, Secondary Boys kaibahan sanday Lance Nathan Magno, Earl Jude Buncion, ag Troy Castor.
Ginpahayag dugang ni Escullar nga positibo pa sanda nga makahakot it medalya ro mga atleta it rehiyon hasta sa matapos ro mga hampang.
