KALIBO, Aklan—Padayun nga nagahataw ro Western Visayas sa nagapadayun nga Palarong Pambansa 2023 sa Marikina City.
Sa pinaka-ulihi nga medal tally, ginpahayag ni Department of Education ukon DepEd region 6 spokesperson Hernani Escullar jr., nga nagapanguna eon ro Western Visayas sa partial and unofficial medal tally.
Ro rehiyon hay nakatipon it 26 gold, 19 silver, ag 11 bronze medals.
Raya man hay ginsundan it National Capital Region (NCR) nga imaw ro defending champion ko 2019 Palarong Pambansa ag una sa third spot ro Cavite, Laguna, Batangas, Rizal ag Quezon ukon CALABARZON nga may 21 gold, 26 silver, ag 20 nga bronze medals.
Suno kay Escullar nga ro individual sports partikular sa athletics ro nagdaea sa rally it Region 6.
Posible suno kana nga hin-aga nga adlaw it Biyernes hay masayuran man ro resulta it nagapadayun nga team sports.
Nagapanguna suno kana ro Calabarzon bangud sa mga mayad nanda nga swimmers sa elementary ag secondary boys nga nakahakot it 7 golds sa nagtaliwan nga daywang adlaw it pahampang.
Sa pihak kara, nagapabilin nga mabaskog ro buot it andang mga players nga madugangan pa ro gold medals agud nga maagaw ro kampeonato.
Raya hay nagakahueugan sigon nga target nanda ro mas maabu nga gold medals bangud nga ro magadaog sa makaron nga national sports event hay iga-ranggo base sa numero it gold medals.
Sa kasaysayan, ro NCR ro pirmeng nagadomina sa Palarong Pambansa nga nagabuyot it overall championships.
Samtang ro Calabarzon ag Western Visayas hay naga-agawan para sa second place.
Sa pihak nga parte, maskin nga owa suno kana it untat ro uean sa Marikina City hay owa raya naging sabeag agud nga madelay ukon mapundo ro mga hampang.
24/7 man sigon nga nakabantay ro andang medical team sa billeting quarters ag sa playing venues agud nga magbantay sa mga players nga makaangkon it injury ukon mag-eain ro pamatyag bangud sa daeagan it tiempo.
