KALIBO, Aklan—Nakaangkon it aberya ro pagbalik eskwela it mga estudyante sa pampublikong eskwelahan makaron nga adlaw it Martes, Agosto 29 bangud sa maeain nga paniempo daea it bagyong Goring.
Ginhalimbawa ni Hernani Escullar, tagapaghambae it Department of Education ukon DepEd region 6 ro probinsiya it Aklan, kun sa siin sa 17 nga banwa hay 15 ro nagdeklara it class suspension.
Sa atubang kara hay owa sanda it na-monitor nga anuman nga untoward incidents halin sa mga pasilidad it taeatapan, kun sa siin nagaeaum sanda nga hasta hinduna nga hapon sa andang padayun nga monitoring hay owa it mailistang nagkaeasamad nga mga kagamitan it mga eskwelahan ag mga naninahan nga mga estudyante.
Dugang pa ni Escullar nga makaron ro unang adlaw it pagsug-aeaw sa sangka bag-ong academic year ag sangka bag-ong programa nga ginlunsar it gobyerno para sa mga estudyante sa kindergarten hasta grade 10.
Sa pihak nga parte, sa masobra sa 1.7 million nga mga enrollees sa bilog nga Western Visayas, ginpahayag it DepEd nga 1,532,692 ro mga estudyante halin sa mga pampublikong eskwelahan samtang ro iba hay naghalin sa mga pribadong institusyon.
Sa Aklan, ro total number of enrollees hay naga abot sa 124,795.
Raya hay base sa datos it DepEd as of alas-8:00 kaina it agahon.
Dugang pa ni Escullar nga pwede pang magbaton it mga late enrollees ro mga eskwelahan agud nga indi makahikawan ro mga inunga nga gustong magtuon.
