KALIBO, Aklan — Ginkumpirma it Commission on Elections ukon COMELEC-Aklan nga may pilang mga kandidato eon sa probinsiya it Aklan ro ginpapanaugan it ‘Show-Cause Order’ kontra sa pilang mga kandidato para sa Barangay ag Sangguniang Kabataan Elections bangud sa mga pageabag sa tempranong pagpangampanya.
Suno kay Chrispin Raymund Gerardo, tagapaghambae it COMELEC-Aklan nga ro banwa it New Washington ro may pinakamataas nga numero it mga kandidato nga gin-isyuhan it Show Cause Orders.
Raya hay kasunod it ginpaabot nga reklamo sa komisyon angot sa premature campaigning.
Ginpaathag ni Gerardo nga ginapa-explain kara ro mga eakot nga kandidato kun sa siin ginataw-an sanda it tatlong adlaw nga palugit matapos nga mabaton nanda ro show cause order.
Sa pihak nga parte, ginklaru pa ni Gerardo nga ro pagpanupod it anuman nga bagay kapareho it t-shirts, kabkab, kaeo, ag iba pa para sa kampanya sa Barangay ag Sangguniang Kabataan Elections hay makabig nga vote-buying ukon vote-selling.
Ginpamilit pa kara nga ro maximum size para sa posters ag tarpaulins hay 2×3 feet; 8.5×14 inches para sa leaflets ag fliers; ag 3×8 feet para sa banners ag streamers.
Dapat ibutang raya sa mga designated nga poster area ag kon sa private property dapat nga may pahanugot raya sa nagapanag-iya.
Ro pagpatukar man it mga jingle hay dapat hay may special permit ag sa sueod it regulatory time agud nga indi magatuga it disturbo.
