KALIBO, Aklan—Nag apela it bulig ag kooperasyon ro pamunuan it Muguing Elementary School sa mga natungdan agud nga madasig nga maresolba ro owa pagka-ilintindihan angot sa ginpasarado nga daean it pamilya Cristobal sa nasambit nga barangay.
Suno kay Rex Manares, principal it nasambit nga eskwelahan nga nagpasilabot eon imaw sa isyu bangud sa pagkabaeaka sa kamaeayran it anang mga estudyante ag mga residente nga naga-agi sa lugar.
Ginpahayag dugang nga agud nga maklaruhan hay nag-agto imaw sa taeatapan it Department of Environment and Natural Resources ukon DENR-Aklan agud nga mausisa ro estado it ginpasarado nga property.
Natukiban sigon nana nga may naga-eksister gid man nga easement of right of way base sa ginpakita kana nga cadastral survey.
Nagaeaum imaw nga matumod eon sa mas madali nga tiempo ro eugta nga ginapanag-iyahan it pamilya Cristobal ag ro right of way agud nga mabo-oe eon ro ginbutang nga kurae.
Handum man nana nga makaangkon it win-win solution sa pag-istorya it mga natungdan eabi eon it barangay council ag pamilya nga nagapanag-iya it magtimbang nga eugta agud nga kon mausoy eon ro right of way hay maayos eon ro karsada ag matambakan it baeas.
Nauna kara, nagpatawag man sigon imaw it meeting sa anang PTA ag alumni association agud nga makapangayo it bulig sa mga kinahangeanon sa pagpaayos it karsada.
Madumduman nga naging kontrobersiyal ro desisyon it pamilya Cristobal matapos nga ipasarado ro portion it andang eugta nga nakasanayan eon nga agyan it mga tawo ag mga saeakyan pasueod ag paguwa sa Muguing Elementary School, barangay hall, day care center, simbahan ag iba pang mga residente nga naga-istar idtu.
