KALIBO, Aklan—May nakataeana eon nga schedule para sa pay-out it social pension it mga senior citizens sa bilog nga probinsya it Aklan.
Suno kay Atty. May Castillo, spokesperson it Department of Social Welfare and Development ukon DSWD region VI nga may schedule eon it pay-out ro mga social pensioners sa banwa it Altavas, Balete, Malay, Batan, Ibajay ag Nabas nga igapatigayon makaron nga buean it Pebrero.
Ro iba sa mga raya hay ginpaagi sa andang munisipyo kon sa siin idto gintransfer ro kwarta nga ginakaeakipan it banwa it Banga, Madalag, Malinao ag Lezo para sa first batch hasta sa buean it Abril.
Samtang, ro second batch hay ro munisipalidad it Kalibo, Libacao ag New Washington kamana man ro transfer of fund nga second batch hay ro Buruanga, Makato, Tangalan ag Numancia.
Dugang pa ni Atty. Castillo nga kon itransfer ro kwarta hay igamonitor raya it DSWD personnel kon sa siin Enero hasta it Hunyo ro first semester rason nga magabaton sanday lolo ag lola it P6,000 ukon P1,000 kada buean ag raya man ro matabo sa second semester.
Pagklaro ni Atty. Castillo nga dapat ro mga benepisyaryo hay indigent senior citizen, uwa gabaton it pension maghalin sa GSIS, SSS Philipine Veterans ukon ibang ahensya it gobyerno kamana man uwa gabataon it suporta maghalin sa pamilya.
Ginaprayoridad man suno kana ro mga maeuya, may disability ag masakiton.
Eauman nga magadugang pa ro listahan sa bulig it mga legislators rason nga makipagkooperar eamang ro mga raya sa Office of the Senior Citizens Affairs ag sa Local Government Unit bangud kanda nakikipag-angot ro mga personnel it DSWD.
Pagpasiguro kara nga ginapaabot nanda ro mga pangaean nga una sa waiting list agud nga maeakip sanda sa masunod nga dag-on.
Samtang sa bilog nga Western Visayas hay may una nga masobra sa 380,000 ka mga benepisaryo.
Ro kabilugan nga pay-out pinaagi sa DSWD hay 16,382 makaron nga Pebrero.
Padumdom nana nga magpamati eamang sa OSCA agud nga masayuran ro mga schedule nanda.
Mensahe pa ni Castillo sa mga pamilya it nakabaton hay gamiton ro kwarta para sa ikamayad it mga senior citizens, kaparehas it pagbakae it pagkaon, maintenance ag vitamins.
