KALIBO, Aklan—Umpisa makaron nga adlaw it Martes, magapatigayon it kaugalingon nga version it simbang gabi-i ro mga kababayan naton nga Muslim sa andang natungdan nga mga moske sa pormal nga pag-umpisa it tiempo it Ramadan.
Raya ro ginpahayag ni Solay Hajuinos, presidente it Numancia Muslim community.
Apang sa ibang nasyon suno kana kapareho it Saudi Arabia hay nag-umpisa eon ko adlaw it Lunes ro andang Ramadan matapos nga makaangkon it moon sighting nga imaw ro nagadetirmina it pag-umpisa it andang pagpu-asa.
Ginpahayag dugang nga opisyal nga naga-umpisa ro andang fasting bandang alas 4:00 it aga-aga hasta alas-6 it gabi-i.
Sa ginapatigayon nga fasting, bawae kara ro pagkaon, pag-inom it aeak, ag sexual activities.
Tuyo sigon kara nga mapatuman ro pag-kontrol sa kaugalingon ag makalikaw sa mga kasae-anan.
Madumduman nga bangud sa owa nakita ro cerescent moon ko March 10, gindeklara eon lang ro petsang March 12 para sa pormal nga pag-umpisa it Ramadan sa Pilipinas.
Magabuhay it 30 diyas ro pagdumdum sa Holy Ramadan.
