KALIBO, Aklan—Naga-abot sa 2.5 ektarya ukon 25,000 sq. meters it eapad it eugta ro nadaeasa sa natabu nga grassfire sa Brgy. Dumatad, Tangalan, bandang alas-12:20 it aga-aga it Domingo.
Ro insidente hay nag-eontad sa tunga it opisyal nga pagdeklara it tiempo it tag-init.
Suno kay FO2 Henry Tuazon, arson investigator it Bureau of Fire Protection ukon BFP-Tangalan nga aga-aga it Domingo kat nakabaton sanda it tawag angot sa nagakalhit nga kaeayo sa mga halimunon, kogon, ag maskin ro pilang mga tanum nga puno it kahoy hay nadaeahig man sa insidente.
Sa makaron hay nagapadayun pa ro andang imbestigasyon partikular ro pagtumod kon ano ro naging rason ukon ginhalinan it kaeayo.
Bangud nga masyadong mamaea ro mga halimunon sa lugar hay madasig nga nagkalhit ro kaeayo.
Pag-abot it ala-1:40 it aga-aga hay nagdeklara it second alarm ro andang ground commander nga ginrespondehan it BFP Makato.
Nagbuhay it daywang oras antes nga eubusan nga natapna ro sunog sa bulig it mga katapo it municipal disaster risk reduction and management office ukon MDRRMO-Tangalan .
Dugang pa ni FO2 Tuazon nga nakikipag angot sanda sa department of environment and natural resources ukon DENR sa numero it mga nadaeasa nga mga pananum sa lugar agud nga makahimo it final report eabi eon sa kahalitan sa nag-eontad nga grassfire.
Samtang, uman nga nagpadumdum ro BFP Tangalan nga indi basta-basta nga magpilak it upos it sigarilyo ukon magsuga nga posibleng pagahalinan it makahaealit nga sunog.
