KALIBO, Aklan—Ginpahayag it Bureau of Fire Protection nga uman nga nakadeploy ro andang mga tawuhan ag fire truck sa gintaeana nga lugar agud nga magtau it first aid sa mga nagakinahangean sa tunga it ginaeauman nga pagdagsa it mga tawo sa mga simbahan ag iba pang pilgrimage sites.
Suno kay SFO3 Anthony dela Cruz, hepe it BFP-Numancia nga kaibahan it andang fire truck nga nakastandby hay ro tatlong ambulansiya it Municipal Disaster Risk Reduction and Management Office ukon MDRRMO.
Ro nasambit sigon nga mga ambulansya hay kumpleto sa mga bueong para sa paunang medikasyon ag mga kagamitang pang-emergency.
Sa pihak nga parte, uman nga nagpadumdum si SFO3 dela Cruz sa publiko nga mas maging madahan ag alisto agud nga malikawan ro sunog sa tunga it naeksperyensiyahan nga grabeng kainit it paniempo.
Importante suno kana nga ro kada pumueuyu hay may kasayuran angot sa mga kaeabanan nga nagiging rason it sunog ag makaangkon it kasayuran sa mga tikang nga paga-obrahon agud nga maka-eowas engkaso nga magkasunog sa lugar.
Ginadumdum makaron nga marso ro fire prevention month nga nagatuyo nga mapataas ro kasayuran it publiko angot sa kaeowasan ag paglikaw sa mga aksidente it sunog.
Importante man sigon nga masayuran ro emergency number sa inyong lugar.
