KALIBO, Aklan—Amat-amat eon nga ginadayo it mga deboto ro Bukid Tigayon ukon Tigayon Hill makaron nga huwebes santo para sa Semana Santa.
Ro Bukid Tigayon kun sa siin kitaon sa ubos kara ro Aklan River hay sambilog sa mga sikat nga sites sa banwa it Kalibo agud nga mag-Via Crucis, para sa spiritual enrichment ag nature lovers.
Ro bukid nga ginasugid nga sekretong panaguan it mga hangaway nga Akeanon ko tiempo it Spanish rule hay kaeabanan nga ginadagsa it ginatos nga mga pilgrims kada Kuwaresma.
Kapin sa 144 nga hagdan ro paga-agyan antes nga maka-abot sa alipunto kun sa siin makita ro chapel ag pilang mga rest areas agud nga mataw-an it kahigayunan nga makita ro manami nga view it banwa it Lezo ag Kalibo.
Sa pihak nga parte, gin-umpisahan eon makaron nga adlaw , Marso 28 ro Bugna it Tigayon kun sa siin nagkaeain-eain nga mga baligya nga tanum, tinuean-on ag kakanin nga himo it mga tumandok it Tigayon ro pwedeng mapilian ag mabakae.
