KALIBO, Aklan—Gindagsa it maabong tumaean-aw partikular it mga pamatan-on ro libreng concert it bandang Ben&Ben hatod it Aklan provincial government sa pagpanguna ni Aklan governor Jose Enrique Miraflores sa ginpatigayon nga Akeanon night nga ginhiwat sa Aklan Sports Complex sa Brgy. Calangcang, Makato bilang kaparte it nagahilapit nga selebrasyon it Aklan Day sa Abril 25 it presenteng dag-on.
Temprano pa eamang hay napuno eon it tawo ro nasambit nga lugar bangud nga mag-eowas sa nasambit nga banda hay may iba pang mga performers nga nag-entertain.
Angot kara, hugot man nga seguridad ro ginpatuman it nagkaeain-eain nga law enforcement agency para sa tanan nga nagtambong sa nasambit nga kasadyahan.
Magapadayon ro iba pang aktibidad sa capitol grounds kon sa siin nahamtang ro tsibugan sa kapitolyo hasta sa mismong ika-68 anyos nga anibersaryo it probinsya it Aklan.
