KALIBO, Aklan—Padayun nga ginaproblema makaron ro gutok nga mga presuhan sa Western Visayas sa pagdumaea it Bureau of Jail Management and Penology ukon BJMP.
Raya hay sa pihak it ginpatigayon nga construction ag rehabilitation it 39 nga jail facilities sa rehiyon nga nagatuyo nga masabat ro gutok nga mga presuhan suno sa Regional Development Council .
Dugang pa nga mas nag-grabe ro jail population density and custodial ratio nga nag-abot eon 2.02 inmates per 4.7 square meters ko dag-on 2020 ag 2021 kumpara sa 2.0 ko 2019.
Bangud kara, napaseawan sigon ro Western Visayas nga maabot ro plan targets para sa jail population density and custodial ratio.
Naga-isaeahanon nga ro Bacolod City ro nakaangkon it “Justice Zone” sa Western Visayas ag pang-lima sa bilog nga nasyon.
Nakasunod sigon ro Bacolod City sa rating system nga gintukod it Justice Coordinating Council.
Nataeupangdan man it council ro pagtaas it numero it mga aplikante para sa parole and probation ag numero it mga kaso nga gina-imbestigahan nga gin-refer sa mga korte ag Board of Pardons and Parole.
Sa pihak kara, pila sa mga nasambit nga kaso hay napas-eawan matapos nga owa masabat ro mga requirements tuga it pagbag-o sa Rules of Court angot sa plea bargaining para sa drug-related cases.
Agud nga masabat ro nasambit nga problema, ginpamilit it council nga importante nga mapa-ayos ro disposition it mga kaso ag makaangkon it barato nga legal services.
Raya hay nagakahueugan nga kinahangean ro madasig nga pagpapanaog it mga resolution sa kaso it mga Persons Deprived of Liberty (PDL) ag iba pang vulnerable groups sa sueod it mga jail facilities.
Samtang, ro kakueangan sa numero it mga prosecutors ro nagapabilin nga numero uno nga hangkat sa pagresolba it mga kaso sa Region 6.
Sa makaron hay may una sigon nga kapin sa 140 nga prosecutors sa rehiyon nga naga-tratar sa masobra sa 19,128 nga caseloads hasta ko 2021.
Sa kabilugan nga 23 nga mga prosecution offices sa Western Visayas, kapin sa 10 ro may average caseloads it indi magnaba sa 500 cases sa kada prosecutor.
Nauna eon nga ginpasiguro it Department of Interior and Local Government (DILG) sa Region 6 nga makatukod it mga “peacemakers” sa kada barangay sa rehiyon agud nga mapa-ayos eagi ro mga ginadangop nga owa pagka-ilintindihan ag indi eon maka-abot pa sa korte.
