KALIBO, Aklan – Pormal eon nga ginbuksan ro Polyclinic Satellite Health Center sa Barangay Andagao, Kalibo.
Suno kay Kalibo Vice Mayor Cynthia Dela Cruz nga ro limang milyong piso nga pondo nga gingamit sa pagpatindog it proyekto hay halin sa andang nadag-an nga premyo matapos kilaeahon bilang best government practices sa idaeum it Seal of Good Local Governance ukon SGLG ko 2023.
Gindesisyunan sigon nanda nga magpatindog it sambilog pang health center bangud nga medyu may kalumaan eon ro RHU 1 sa munisipyo.
Mag-eowas kara, tuyo man nanda nga mabawasan ro pagtumpok it mga tawo sa nasambit nga health center ag sa RHU 2 sa N. Roldan St. Kalibo.
Target nga serbisyuhan it makabig nga health center cluster ro mga residente it Andagao, New Buswang, Northern part it Estancia ag Pook.
Plano man nanda nga isaylo ro mga staff it RHU 1 sa bag-ong health center.
Maskin nga ginbuksan eon, owa pa raya gin-okupahan bangud sa kakueangan it iba pang mga pasilidad kapareho it airconditioning unit.
Posibleng sa masunod nga buean hay maserbisyuhan eon kara ro publiko nga nagakinahangean it atensyong medical.
Dugang pa ni Vice Mayor Dela Cruz nga nakataeana man sanda nga magatukod it sambilog pang health center sa Barangay Tigayon.
Raya hay mag-eowas pa sa naga-eksister makaron nga super health center sa nalook nga natapos eon apang bukon pa it operational bangud sa kawad-an it personnel ag owa pa na-inagurahan
Sa pihak nga parte, kaibahan pa sa plano makaron it LGU-Kalibo hay ro modernization sa transportation plan para sa maayos nga daeagan it trapiko, pagkaayad it mga karsadahon, tamang paghimos sa mga basura ag iba pa.
Nagapadayun man ro beautification sa kalibo pastrana park kaibahan ro auditorium sa nasambit nga lugar.
