KALIBO, Aklan–Bangud sa nataeupangdan nga presensiya eon man it mga menor de edad sa dis-oras it gabi-i sa mga karsadahon sa banwa it Kalibo, uman nga ginpabaskog ro pagpatuman it curfew hours.
Suno kay Punong Barangay Neil Candelario it Poblacion, Kalibo nga sa kamatuoran hay may pilang menor de edad nga nag-eabag sa mandu ro nagapangatubang makaron sa community service bilang penalidad .
Raya hay sandig suno kana sa naga-eksister nga executive order ni Mayor Juris Sucro nga bawae eon nga magguwa ro mga minors umpisa alas-10 it gabi-i hasta alas-4 it aga-aga mag-eowas eamang kon may kaibahan nga ginikanan ukon guardian.
Tuyo sigon kara nga maprotektahan ro mga pamatan-on kontra sa anumang krimen kapareho sa paggamit it iligal nga droga, paeanakawan ag iba pa.
Dugang pa ni kapitan Candelario nga gin-pueong eon nana ro anang mga barangay peacekeeping action team agud nga hugtan ro pagpatuman it curfew hours.
Uman sigon nanda nga naging problema ro pagwinarang it mga pamatan-on umpisa ko opening salvo kun sa siin ro pila sa mga raya hay naeakot sa kinagamo.
Angot kara, nag apela ro opisyal sa mga ginikanan nga bantayan it husto ro andang mga menor de edad nga unga agud nga mailikaw sa anuman nga peligro .
