TANGALAN, Aklan—Ginatantya nga kapin sa P8,000 hasta P12,000 pesos ro danyos it nag-eontad nga sunog sa Brgy. Panayakan, Tangalan, aga-aga it adlaw it Lunes.
Suno kay FO2 Henry Tuazon it Bureau of Fire Protection ukon BFP Tangalan, gin-eamon it kaeayo ro kusina nga parte it baeay ni Carlito Sacapaño, sa legal nga edad ag residente it nasambit nga lugar.
Human sigon raya sa light materials rason nga madasig nga gin-eamon it kaeayo nga tumupok man sa iba pa nandang kagamitan.
Ginpahayag dugang ni FO2 Tuazon nga nagapadayon pa ro andang imbestigasyon sa insidente agud nga matumod ro naging rason it sunog matapos nga uwa it installation it kuryente sa nasambit nga parte it baeay.
Sa pihak kara, uman nga nagpadumdom ro BFP sa publiko nga maging responsable sa tanan nga oras bangud nga uwa it ginapili nga oras ukon lugar ro pag-eontad it sunog.
Ugalion nga isikyar ro dapog kon nakapatay eon ro mga baga ag siguraduhon nga uwa it maeapit nga bagay nga pwedeng maduktan it kaeayo.
Mag-eowas kara, siguraduhon nga nakahukas sa mga saksakan ro mga appliances kon uwa ginagamita kapin eon kon ginaaywanan ro panimaeay para maeowas sa anuman nga insidente ro mga propyedad.
