KALIBO, Aklan—Nasaksihan ro pagpatumba it Aklanon boxer sa andang mga kontra sa hampang nga boxing sa nagapadayon nga Western Visayas Regional Athletic Association ukon WVRAA Meet 2025 sa probinsya it Aklan.
Raya hay matapos nga makabueo it tatlong gold, sangka silver ag ap-at nga bronze medal ro boxing team it Aklan kon sa siin tatlo sa mga raya hay sigurado eon nga makahampang sa Palarong Pambansa sa Laoag City, Ilocos Norte.
Suno kay boxing trainor Jun Montessa, gindomina nanday Ryan Salvio it banwa it Madalag; James Philip Baliguat it banwa it Ibajay ag Genesis Flores it isla it Boracay ro tatlong bueawan nga medalya nga magadaea kanda sa Palarong Pambansa.
Suno pa kay Montessa, nagbunga ro pagtinguha, sakripisyo ag training it mga inonga kon sa siin uwa sanda napas-eawan nga makaamot it medalya para sa probinsya it Aklan.
Nasayuran nga napueo ro ginpadaea nga atleta it Aklan kon sa siin nakipagsambuwa ro mga raya sa tatlong kategorya.
Ro nasambit nga regional sporting events hay magabuhay hasta sa Marso 8 sa nasambit nga probinsya.
