LEZO, Aklan—Bangud sa pagtau it kumpiyansa sa mga estrangero, kapin sa P60,000 ro nabo-oe halin sa mag-asawang negosyante matapos nga mabiktima ro mga raya it “Budol-Budol” Miyerkules it hapon, sa diversion road nga sakop it Barangay Carugdog, Lezo.
Nakilaea ro mga biktima nga sanday Erwin ag Felly Nagtalon, parehong senior citizen ag residente it Brgy. Camanci Norte sa banwa it Numancia.
Sa interview it Bombo Radyo Kalibo, ginpahayag ni tatay Erwin nga samtang nagapa-uli eon sanda it anang asawa kaibahan ro sangka helper sakay it topdown tricycle halin sa probinsiya it Antique nga nagbakae it baka kat gin-ipingan ag ginpunduhan sanda it sangka brand new nga kotse sakay ro daywang eaeaki ag daywang babaye nga puro mga indian looking individual ukon matsa mga Bombay ag English speaking.
Sigidas man sigon ro andang pagbusina rason nga andang ginpunduhan nga mag-asawa.
Kasunod kara, nagkutana sigon ro mga raya it direksyon paagto sa isla it Boracay.
Mag-eowas kara, ginhinyu man nanda kon pwedeng makapabaylo it andang daea nga dolyar ag kon ano ro itsura it kwarta it Pilipinas.
Sa owa it karason-rason gulpi eamang sigon nga ginkuot it sambilog sa mga suspek nga eaeaki ro bag it anang misis , kun sa siin , masyado suno kana nga madasig ro mga hitabu ag owa nanda napan-uhan nga nabo-oe eon ro pila sa andang daea nga kwarta nga nakasueod sa sobre.
Ginasugid nga kapin sa P150,000 ro daea nanda nga kwarta sa pagpamakae it baka sa nasambit nga lugar.
Nagpangayo pa sigon it pasaylo ro mga suspek antes nga nagpanaw paagto sa direksyon it banwa it Makato.
Pag-uli sa andang baeay hay dikara pa eamang nanda nadiskubrehan ro pagkaduea it andang kwarta.
Sa pihak nga parte, nagaeaum si nanay Felly nga kabay nga maibalik pa ro andang nabo-oe nga kwarta nga suno kana hay andang inutangan nga mag-asawa para sa andang negosyo.
Kadungan kara, nagpaandam man imaw sa iba nga indi basta-basta nga magkumpiyansa ag makipag istorya sa mga tawo nga bukon it kakilaea agud nga indi mabiktima it mga maeain nga element kapareho it mga budol-budol.
Ginasugid nga mag-eowas sa mag asawang Nagtalon hay may iba pang nabiktima ro mga suspek .
Modus sigon nanda nga nagakutana anay kon ano ro mga kulay it nagkaeain-eain nga kwartang papel it nasyon.
