KALIBO, Aklan—Ginpanindugan it Aklan Integrated Transport nga mataas ro porsyento it andang consolidation rate kon sa siin ginatinguhaan nanda nga maipaabot sa gobyerno ro andang mga kinahang-eanon agud nga makasunod ag matuman ro programa nga inde sanda eubusan nga maapektuhan.
Suno sa founding officer it kooperatiba nga si Mark Limaco, kapin sa 90 porsyento ro nagpaconsolidate sa Aklan para sa Public Transport Modernization Program it gobyerno nga ginakabig nga bukon it sangka maisot nga programa bangud sa maabong phases ro ginaagyan antes nga eubusan raya nga maipatuman.
Gin-insister ni Limaco nga ro nabilin nga napueong prosyento hay hungod nga uwa eon nagpaconsolidate bangud nga kaeabanan kanda hay magueang ag uwa eon naila pang magbyahe.
Antes suno kana eubusan nga maipatuman ro Public Transport Modernization Program hay may nagakaigo eon nga Local Public Transport Route Plan (LPTRP) nga raya sa makaron ro ginatinguhaan sigon it lokal nga gobyerno it Aklan.
Mag-eowas kara, dapat may nagakaigo nga terminals ag ro mga nakikita nga ginconstruct nga bus stop hay kaparte sigon raya it Public Transport Modernization Program it gobyerno.
Sa pihak kara, nag-apela sigon si Limaco sa Land Transportation Franchising and Regulatory Board (LTFRB) nga hinay-hinayon ro pagpatuman it Public Transport Modernization Program sa Aklan bangud sa kawad-an pa it flights sa Kalibo International Airport nga eubus nga nakaapekto sa transport sector.
