KALIBO, Aklan — Naka full alert eon makaron ro mga kapulisan sa banwa it Kalibo para sa Semana Santa.
Suno kay P/Major Frensy Andrade, OIC chief of police it Kalibo Municipal Police Station nga umpisa ko Abril 13 hay nakadeploy eon ro andang mga tawuhan sa mga simbahan, malls ag iba pang matawong lugar.
Mag-eowas kara, ginatutukan man nanda ro mga bus terminal, airport ag seaports bangud sa pagdagsa it mga nagabiyahe.
Bangud nga ro Semana Santa hay sangka religious event, ginaeauman suno kana ro pagdagsa it mga tawo sa simbahan ag mga pilgrimage sites nga anda eon nga ginabantayan.
Bangud nga raya nga tiempo hay sangka bakasyon man, magabuhay ro andang deployment hasta sa Abril 20, kun sa siin ginaeauman nga magiging fully booked ro mga resorts, ag pagadagsaon ro mga baybayon ag kasubaan.
Owa man sigon ginapasugtan ro leave ag day-off it mga kapulisan sa raya nga mga paniempo.
Naka alerto man sigon ro PNP kontra sa mga gusto nga mag pamentaha sa sitwasyon.
Padumdum pa ni Andrade sa publiko eabi eon sa mga magabiyahe ag maga-excursion sa Easter Sunday nga magdahan sa daeanon, indi magmadali ag kun kinahangean hay mag-drive nga bukon it hilong.
