NATIONAL News — Ginabasoe it Malakanyang sa maeapnagon nga ‘fake news’ ro pagnaba it trust ag performance rating ni Pangueong Ferdinand ‘Marcos Jr.
Ginpahayag ni Presidential Communications Undersecretary ag Palace Press Officer Claire Castro sa press briefing sa Malakanyang nga owa man nagasaeaming ro 2,400 respondents sa survey nga ginhimo it Pulse Asia sa kabilugan nga 100 milyong katawo sa nasyon.
Sa pihak kara, gin-aku ni Castro nga dapat eamang nga taw-an it atensyon kon ano ro mga ginahambae it survey maskin nga 2,400 eamang ro respondents, apang raya hay bukon it kabilugan nga sentimyento it bilog nga Pilipinas.
Ginpamilit pa ni Castro nga magatrabaho gihapon ro Pangueo ag kapareho sigon it anang ginpahayag nga pagahimuon it Chief Executive kun ano ro tama, kun ano ro sa laye ag bukon it bangud nga raya hay ginadikta it tawo nga owa man nagakasinanto sa laye.
Sa report, bumagsak ro trust ag performance ratings ni Pangueong Ferdinand Marcos Jr., ko buean it Marso.
Raya hay kabaliskaran sa nakitang pag-mayad it trust ag performamce ratings ni Vice-President Sara Duterte.
Makita sa resulta kan-o eamang it survey it Pulse Asia Research para sa andang March 2025 Ulat ng Bayan survey, nagnaba it 17% ro approval rating ni Pangueong Marcos halin sa 42% ko Pebrero sa 25% ko Marso.
Ro anang disapproval rating hay nagsaka man it 21 puntos ukon 53%.
Ginasugid nga mayorya it mga Filipino ukon 54% hay nagpahayag man it andang kawad-an it kumpiyansa sa Pangueo, nagtaas halin sa dating 32%. Nagnaba man ro anang trust rating it 42% ko Perbrero hay naging 25% ko Marso.
Samtang, si VP Sara eamang ro mataas nga opisyal it gobyerno nga nakabo-oe it maayos nga performance ratings, ro anang approval rating hay nagtaas it 59% halin sa 52%; ag ro disapproval rating man kara hay nagnaba sa 16% halin sa 26%.
Nagtaas man ro trust score ni VP Sara it 8% halin sa 53% ko pebrero hay naging 61% it Marso.
Ro survey hay ginpatigayon umpisa March 23 hasta 29, 2025, may 2,400 adult Filipino ro gin-interview pinaagi sa multi-stage probability sampling.
