KALIBO, Aklan — Owa it may nailistang motorista ag biyaherong naka-eksperyensiya it aberya sa daeanon sa pagdumdum sa Semana Santa sa probinsiya it Aklan.
Raya ro ginpahayaag ni Engr. Joey Ureta, head it maintenance division it Department of Public Works and Highways (DPWH)-Aklan kasunod it andang ginkasa nga Oplan Lakbay Alalay.
Suno kana nga ro gin-respondehan eamang it andang ahensiya hay ro sangka reklamo sa Brgy. Agbago, Ibajay, kun sa siin may nag-us-us nga eugta sa andang ginakompuni nga national road nga naka apekto sa daeagan it trapiko.
Insigida sigon sanda nga nagbutang it signages ukon nagakaigo nga abiso sa mga motorista agud nga malikawan ro anuman nga disgrasya.
Sa makaron hay nakipag-angot eon sigon sanda sa contractor it nasambit nga proyekto.
Ginpahayag dugang nga ginlarga ro Oplan Lakbay Alalay umpisa ko Miyerkules Santo, Abril 16 hasta Abril 19 Sabado de Gloria.
Nagdeploy ro ahensiya it mga team sa mga nagapangunang daeanon partikular sa Cabangila, Altavas, Capitol Site, Kalibo kamana man sa prente it andang opisina ag sa Caticlan, Malay agud nga madaling makaresponde sa mga motorista eabi eon sa mga masamaran it saeakyan.
Samtang, antes ro Semana Santa hay naging masako sanda sa paghimo it maintenance work eabi eon ro patching ukon pag-repair sa mga lubak-lubak nga karsadahon sa eastern ag western roads.
