KALIBO, Aklan — Ginpasiguro it Police Regional Office 6 (PRO-6) nga haeos preparado eon man ro andang linya para sa maabot nga midterm elections sa May 12, 2025, kabulig ro iba pang security forces sa rehiyon.
Suno kay P/Lt. Col. Arnel Solis, tagapaghambae it PRO-6 sa interview it Bombo Radyo Kalibo nga mabuhay eon nga gin umpisahan ro mga pagpahaum rason nga nagapabilin nga maayos ag malinong ro sitwasyon haeos daywang domingo antes ro eleksyon.
Nakasentro sigon ro andang operasyon sa law enforcement ag crime prevention, kun sa siin owa it anuman nga nailistang election related incidents.
Sa ginpatigayon nga checkpoint operations sa bilog nga Western Visayas, nagnaba ro andang nailista nga nag-eabag sa gun ban bangud nga ginkakas eon sa andang record ro Negros Occidental ag Bacolod City matapos nga una eon ro mga raya sa idaeaum it Negros Island Region.
Sa makaron sa bilog nga Region 6, kapin sa 62 ka indibidwal ro naaresto ag 61 nga armas, ap-at nga gun replica ag sambilog nga pampasabog ro nakumpiska bangud sa pag-eabag sa gun ban as of April 24, 2025.
Ginpamilit pa ni Solis nga sa maabot nga eleksyon ro kada polling precincts hay pagabutangan it pulis agud nga masiguro ro kaayusan ag seguridad it publiko.
Samtang, kaabuan sigon nga halin sa probinsiya it Iloilo ro mga lugar nga ginbutang sa election areas of concern sa rehiyon.
Raya hay base sa Regional Joint Security Control Center, apang ginatugyan nanda sa Comelec central office ro pagtumod it nasambit nga mga lugar bangud nga bukon sanda it authorized nga maghambae angot kara.
Sa pihak kara, ginkalipay sigon nanda nga base sa presenteng intelligence reports, owa sanda it namonitor nga anuman nga kinagamo ukon paeag sa nasambit nga mga lugar.
Nagaeaum suno kana ro PRO-6 nga magapabilin nga matawhay ag eowas ro bilog nga proseso hasta sa adlaw it eleksyon.
