KALIBO, Aklan — Ginapatuman it Commission on Elections (Comelec) ro hugut nga pagbawae sa paggamit it cellphone sa sueod it polling precincts sa maabot nga eleksyon sa Mayo 12 kadungan ro paandam nga posibleng maaresto ro sin-o man ro maga-eabag kara.
Suno kay Atty. Dennis Ausan, director it Comelec Region 6 nga ro paggamit it mobile phone sa sueod it polling precinct eabi eon samtang nagaboto hay makabig nga election offense.
May gahum sigon ro mga awtoridad nga naka-assign sa voting centers nga dakpon ro mga tawong madakpan sa akto.
Gin engganyo man nana ro mga botante nga likawan nga mag-check it tawag ukon mensahe mag-eowas eon lang kun raya hay emergency.
Ginapasugtan ro poll watchers ag miyembro it media nga magdaea it cellphone ag mag-record it mga pangkabilugan nga aktibidad sa pagboto, apang hugut nga ginabawae ro pagbo-oe it close-up nga litrato ukon video nga nagapakita kun paalin nga ginmarkahan it sangka botante ro andang balota ukon paalin raya nga ginsueod sa automated counting machine .
Samtang, ginpadumdum ni Ausan sa 3.1 milyong rehistradong botante sa Western Visayas nga ro regular nga oras it pagboto hay umpisa alas 7 it agahon hasta alas 7 it gabi-i, samtang ro early voting nga nakataeana para sa mga senior citizen, persons with disabilities (PWDs), ag mga nabdos hay umpisa alas-5 it agahon hasta alas-7 it agahon.
Ginapasugtan man nga makaboto sa parehong oras ro mga awtorisadong kaibahan it mga vulnerable voters, basta nga rehistrado man sanda sa parehong presinto.
Sa pihak nga parte, ginklaru ni Ausan nga indi kinahangean nga magdaea it valid ID para makaboto, bangud nga bihira ro mga kaso it questioned identity.
May mga kopya it Posted Computerized Voter’s List ro mga miyembro it electoral board, kun sa siin nakalista ro pangaean ag litrato it kada rehistradong botante para sa pagkumpirma it pagkatawo it botante kun sa siin mas madali ro beripikasyon makaron. via PN
