KALIBO, Aklan — Ginpaabot it Bureau of Fire Protection (BFP)-Kalibo nga nakalista sanda it zero major incidents sa bag-o eamang natapos nga National and Local elections ko Lunes, Mayo 12.
Suno kay FO1 Jan Rey Tordecillas, public information officer it BFP-Kalibo nga umpisa ko Mayo 9 hasta Mayo 13 hay naka-red alert status ro andang ahensiya para sa eleksyon.
Antes suno kana ro eleksyon hay activated eon ro andang contingency plan kun sa siin sigidas ro andang fire safety inspection kaibahan ro Comelec sa mga polling precincts nga may kabilugan nga 18 sa banwa it Kalibo.
Nagtukod man sanda it tatlong team nga ginaeakipan it first aid service team, fire suppresion team ag standby personnel sa andang opisina.
Sangka indibidwal eamang sigon ro gin respondehan it andang first aid service team nga sangka asthmatic nga nagboto sa Kalibo Elementary School nga matapos nga mataw-an it paunang medikasyon hay naging maayos man ro anang sitwasyon.
Naging visible man ro andang mga ambulansiya ag firetruck kaibahan ro andang tropa ag MDRRMO Kalibo sa pilang polling centers.
Kapin sa 42 nanda nga personnel ro gin deploy sa field.
Samtang, ginkalipay man nanda ro pagdahan nga ginhimo it mga botante eabi eon it mga una sa vulnerable sector nga ginaeakipan it mga nabdos, senior citizens ag mga PWDs nga nag-avail it early voting hours rason nga nakalikaw sa grabeng init it tiempo.
Maskin sigon ro mga regular voters hay gin-tiempo ro andang pagboto nga bukon it masyadong mainit.
