Masadyang ginpakigbahin it sangka maestro maghalin sa Libacao ro naging eksperyensya ag hangkat sa andang pagiging electoral board sa andang banwa ku nagtaliwan nga eleksyon.
Suno kay Benedick Zaspa, sangka highschool teacher sa banwa it Libacao, haeos limang adlaw sigon ro andang duty ku eleksyon kun sa siin insigida sandang nadeploy sa Sitio Maytaraw, Dalagsaan, Libacao ku Mayo 9. Indi sigon nanda mahuyap ro inagyan nandang suba kun sa siin may mga haagyan sandang hasta liog ro tubi.
Dugang pa nana, ginpasayod eon kanda pilang buean antes ro eleksyon nga idto ro andang area, kun sa siin nagserbe eon sanda bilang electoral boards ku 2022 apang katong tyempo hay hatod-sueang sanda it helicopter. Ku una sigon, naghambae imaw sa anang co-teacher nga kun magatikang hay indi eon lang imaw mag-sunod, apang naging interesado man raya ag naexcite nga masayran ag maeksperyensyahan nga mga hangkat paadto sa nasambit nga lugar.
Paathag man ni Benedick nga ro mga paraphernalia hay kabuligan eon lang it mga pamilyar sa lugar nga hakwaton patabok it suba.
Naging masadya man sigon imaw kat makit’an ro eskwelahan bangud naiisip nana nga madinaeag-on nanang hatikang ro pinakameayo nga sitio sa Dalagsaan.
Dugang pa nana nga naging hangkat man ro kuryente ag internet bangud uwa gid it presenya it kuryente sa nasambit nga lugar. Apang, sa pihak it mga nasambit nga hangkat, madinaeag-on nandang haubra ro andang responsibilidad bilang electoral board apisar nga sanda ro pinaka-ulihi mag pasa it resulta.
Samtang, nagpasaeamat man imaw sa andang mga naging katuwang para makaserbisyo it tama sa mga tawo sa maeayo nga lugar.
