Gin-aprubahan eon sa ikatlo ag pinal nga pagbasa it Senado ro sangka proposisyon nga magatau it libreng eubong para sa mga pinaka-pobre nga pamilyang Pilipino sa nasyon.
Sa idaeum it Senate Bill No. 2965 ukon Free Funeral Services Act, ro mga pobre hay nagatumod sa pamilyang nagakita it manaba sa poverty threshold kapareho it gintaeana it National Economic and Development Authority (NEDA) ag ro mga indi makasarang nga magtau it minimum basic needs kapareho it food, health, education, housing, ag iba pang nagapangunang kinahangeanon sandig sa Republic Act No. 8425 ukon Social Reform and Poverty Alleviation Act.
Igatau ro libreng funeral service sa mga pamilyang una sa crisis situation nga pagatumuron it Department of Social Welfare and Development (DSWD), kaibahan ro mga pigado nga pamilyang apektado it kalamidad, sakuna ag iba pang emergency.
Ro kuwalipikadong pigado nga pamilya hay pagataw-an it “Indigent Funeral Package” kaibahan ro gastos sa pagpahum it funeral documents, pagpa-embalsamo, interment ukon burial services, transport, ag cremation.
Ro mga accredited nga punerarya ukon morgue man hay paga-obligahong magtau it kabaong ukon urn.
Para makabaton it indigent funeral package, ro pamilyang naaywan ukon representante it namatay hay kinahangean nga mag-presentar it mga masunod nga dokumento: valid nga identification card it claimant ukon beneficiary; death certificate nga gin-isyu it ospital ukon city/municipal health officer ukon certification halin sa tribal chieftain; funeral contract nga ginpirmahan it representante it namatayang pamilya; ag social case study nga ginpahaum it sin-o man nga rehistradong social worker.
Ro Senate Bill No. 2965 hay ginsueong ni Senador Raffy Tulfo ag gin-sponsor ni Senador Imee Marcos.
