Nagapangatubang makaron sa mabug-at nga penalidad ro sangka eaeaki matapos mabisto ro mabuhay eon nana nga modus kon sa siin nakapag-book imaw it masobra sa 120 plane tickets halin sa nagkaeain-eain nga airline sa US.
Ginkilaea ro suspek nga si Tiron Alexander, 35-anyos nga napamatud-ang guilty sa kasong wire fraud ag iligal nga pagsueod sa secure area it paeoparan.
Base sa report, halin 2018 hasta it 2024, ginamit ni Alexander ro mga online ticketing system it nagkaeain-eain nga airline pra magpakuno-kuno nga flight attendant ag piloto.
Gamit ro nagkaeain-eain nga pekeng impormasyo, kaibahan ro badge number ag date of hire para makapagbook it mga libreng flight nga mismong para eamang kunta sa mga crew it eroplano.
Nasayuran sa imbestigasyon it mga atworidad nga nakaeopad it libre si Alexander it inde magnaba sa 34 beses.
Sa kabilugan, masobra sa 120 flights ro na-book nana gamit ro nagkaeain-eain nga airline accounts ag saea nga credentials.
